صوبہ پنجاب میں مختلف سیکٹرز کی ترقیاتی سکیموں کو مکمل کرنے کیلئے فنڈز کی منظوری

لاہو ر : پنجاب پلاننگ اینڈ ڈویلپمنٹ بورڈ نے صوبائی ڈویلپمنٹ ورکنگ پارٹی کے34ویں اجلاس میں مختلف سیکٹرز کی 10ترقیاتی سکیموں کے لیے مجموعی طور پر 1کھرب 52 ارب 20 کروڑ 82لاکھ 39ہزار روپے کی منظوری دی۔

اجلاس کی صدارت چیئرمین پلاننگ اینڈ ڈویلپمنٹ بورڈ عبد اللہ خان سنمبل نے کی۔ صوبائی ورکنگ پارٹی کے اجلاس میں ترقیاتی بورڈ کی جانب سے جن سکیموں کی منظوری دی گئی ان میں سیالکوٹ میں یونیورسٹی آف اپلائیڈ انجینئرنگ اور ایمرجنگ ٹیکنالوجیز کے قیام کیلئے 16 ارب 94کروڑ 94 لاکھ 70 ہزار روپے، ڈی جی خان میں ڈی ایچ کیو ہسپتال کو ٹیچنگ ہسپتال میں اپ گریڈ کرنے اور سہولیات کی فراہمی کیلئے 5 ارب 45 کروڑ 28 لاکھ 26 ہزار روپے، ضلع فیصل آباد میں فیصل آباد – ستیانہ روڈ بائی پاس سے تاندلیانوالہ تک (فیز ون، لمبائی 20.61 کلومیٹر) روڈ کی بحالی کیلئے 50 کروڑ روپے، فیصل آباد میں ایم سی حدود سے لے کر رنگ روڈ فیصل آباد روڈز (کل لمبائی 22.67کلومیٹر) بشمول فیصل آباد جڑانوالہ روڈ (لمبائی 3.62کلومیٹر)، فیصل آباد ستیانہ روڈ (لمبائی 7.54کلومیٹر)، فیصل آباد جھنگ روڈ (لمبائی 7.10کلومیٹر)، فیصل آباد سمندری روڈ (لمبائی 3.36کلومیٹر) کی بہتری و بحالی کیلئے 1 ارب 11 کروڑ 50 لاکھ 89 ہزار روپے شامل ہیں۔

جبکہ اسمارٹ آب و ہوا ہائی ویلیو زراعت کو فروغ دینے کے منصوبہ کیلئے 13 ارب 51 کروڑ 55 لاکھ روپے، اسمارٹ آب و ہوا اور موثر میکانائزڈ کاشتکاری کے طریقوں کو فروغ دینے کے ذریعہ پائیدار پیداواری صلاحیت میں اضافہ کیلئے 3 ارب 82 کروڑ 26 لاکھ 55 ہزار روپے، ریسورس کنزرویشن ٹیکنالوجیز کے ذریعہ پانی کی پیداواری صلاحیت میں اضافہ کیلئے 27 ارب 49 کروڑ 38 لاکھ 52 ہزار روپے، ضلع جہلم میں للا انٹر چینج (M-2) برآستہ پنڈ دادن خان(کل لمبائی 128کلومیٹر) روڈ کو دو رویہ کرنے کیلئے 13 ارب 94 کروڑ 79 لاکھ 3 ہزار روپے اور ضلع ڈی جی خان میں کھرر بزدار تا بیواٹا (24فٹ چوڑائی) میٹلڈ روڈ (کل لمبائی 38کلومیٹر) کی تعمیر کیلئے 1 ارب 95 کروڑ 19 لاکھ 45 ہزار روپے کی منظوری کے بعد مذکورہ سکیموں کو پی ایس ڈی پی (PSDP) میں شمولیت کیلئے وفاقی حکومت کو بھجوا دیں۔

اجلاس میں متعلقہ صوبائی محکمہ جات کے اعلی افسران اور پنجاب پلاننگ اینڈ ڈویلپمنٹ بورڈ کے ممبران سمیت سینئر چیف کوآرڈینیشن، اسسٹنٹ چیف کوآرڈینیشن نے شرکت کی۔